Psa 51 | WNC | STEP | Anutu, ga butaya akngatane yapii. Siwan gata nae musip kwikwik natangamuyo. Ga musip kwikwikga buyambamu kayaapa. Unzingge gata waiakngana kuupbam sandekngamuyo.

Psalms 51

Devitda waiaknganae natapan siwan kau aaknga taikut.

1 Anutu, ga butaya akngatane yapii.
Siwan gata nae musip kwikwik natangamuyo.
Ga musip kwikwikga buyambamu kayaapa.
Unzingge gata waiakngana kuupbam sandekngamuyo.
2 Gata tasiwi natane waiakngana kaikane sandewi wena siyok. Unzing nata yangga sauwa wasapma wena singgak binga.
Ngan. Gata natane waiakngana kuupbam sandekngami nata amin nomanda yuwit.
3 Na atnataat. Nata gutonga aknga aknga asinggan pasinggat.
Unzingge waakwau pasinggatde botananga dua singgak.
4 Nata waiaknga wa pasikumu gaekan pasikum. Ngan. Nata wai takngatu takngatu wa tasikumu gae kaikane tasikum.
Unzingge gata kepi noman takngakan tawake na usanzike kaanga wam naniwinu siakan siwik.
5 Ga atnatayak, tapduu mingata na tangaikut gwene na aminu waiaknga tasiya amin dakngakum.
Sike musipganang yukum patangu na waiaknga tasiya amin dakngake yukum.
6 Siwan ngana ga nata wamu siakan takngakan asiknga tawambitde natayak.
Unzingge na gata natdetdetda noman taknganin nanindamumbiyakge nataat.
7 Gata natane waiakngana sandekngami nata dundumna amin dakngake yuwit.
Gata yanggata binga saukngami aminu wasapna wena siknga binga dakngake yuwit. Dakngake yuwawa natane waiakngana gatane kaikane wena siknga siwik.
8 Gata musipma tasiwi apbakngayok. Siakan siknga! Gata nae waiaknganae meya namukuyak.
Namuke natane kwatana zipmanggamumbi apuking ngana gata na tasiwi kwatana waapa apata gatuna take siwanu nata apbakngawit.
9 Gata waiaknga tasikumde undang gatuka ma kawim.
Siwan gata natane gutongana kuupbam asandekngamuyo.
10 Anutu, gata natane musipma tangenawi na musipma kayuk ba dundumna siwikge nataat.
Gata natane waunga tangenake na waungu kayukapa naatang tengami nata gaekan natanggamatawa kekekayok.
11 Siwan gata na ma nanikwasiwi kuwam.
Waungu takwan gataneapa naatang yuau gata ma kaiwi kuwan.
12 Tupa gata na takuyakge apbakngakum. Ge apman kaya gata na gatuka tapi nata gatuna apbakngawit.
Gata gatuka tasike natane musipma tangenawi nata gae wam tawamba kekekawan tasiwitden.
13 Nata gae wam tawake aminu waiaknga tasikaingu yanindamumba
waaminda gatane kepi noman takngaka kakapmake gae gatuna apning.
14 Anutu, ga Anutu na takuyak tapanin,
gata musip kwikwik natangamuke ma nuwi kupam.
Unzing tasingami nata gae kap taike gata nae nomana aknga tasikuyak takngae natake kap taiwit.
15 Buyambam tapa, gata na gatangami
nata wam takngatu yakapmake gatane umanda aknga yatangenawit.
16 Nata kaau gwendu takapuke gae yamuyamuk binga tasiwitde take natapinu nata asiknga takapuke akgamit ngana gata ie take dua nataayak.
Siakan. Nata kaau gwendu tanguke yamuyamuk binga tasiwa katapda isisopubanu gata dua bakngawiyak.
17 Ayok, Anutu! Nata ninae natapa epan nata gae gepbiatang koyuwit. Sike wa natane yamuyamuk takngana binga. Na atnataat.
Gata aminu tapatuta inane waiaknganae meya natake umana inane aknga natapan epik.
Natapan epan kake gata wa apae masa dua siknga imiyak.
18 Siwan gata gika nataak kakngane aminu gatayami Saion yot gapmane takekan yutnong.
Gata gatuka damanu Jerusalem yot gapmane gwenu gatuka tangenayo.
19 Unzingge tapduu aomune amindabamu kepi noman taknga tawake gae ofa takekan gamuning. Gamuke aminu waakwakgane ofa inata inata katapda kuutgan yasikaing.
Ngan, ikwawa gamanu wawi gwengwenu akgamunangge natake gatane alta dakane sawan yasiwan gamukaing.